IMPOSTURES

La selmana grande de Xixón truxo dos actuaciones interesantes nel mesmu día, una tres otra masque n'ubicaciones dixebraes. Falo de música, de grupos del artisteo. El primeru n'actuar en tiempu foi la trupe cubano del Buenavista Club Social. El segundu, "Celtas Cortos".

Propóngovos trescender el fechu musical pescanciao como pura folixa. Si nos movemos nesi campu, pa gustos hai llámpares y sapes, ñocles, cámbaros o esguila y caún tien la so filia, o fobia respective a ritmos, sones y canciones. Y ensin ponese ún mui trescendente, fixeme no paradóxico de que se xuncieren nel tiempu sucesivu dos espíritus, a priori, hermanos. El primeru, un grupu fíu del socialismu real, frutu d'esa inacabable, insufrible (y, poro, imposible) revolución permanente (que cantaba inocentemente na década de los 70 del siegu venti, Georges Moustakis). El segundu, un grupu sozializante, entiñao d'acracia acomodaticio, con sensibilidá que dizse social y... ¿Ta claro que nun me gusten, eim? ¿Va ser cosa de pre-xuiciu?

Los cubanos del "Club Social" que, en realidá, queríen poner "Social-ista" cantaben, na Plaza Mayor, al amor carnal, a la voluptuosidá preferiblemente tropical, a la piel moreno encorteyada por sol y espluma salmorioso. Nuna palabra, al deséu calificao como deseable mientres los vieyos del grupu tiraben de turuta añoso, saxu berrón y mandolina quexono. La muyer del grupu glayaba ellectrónicamente perriba'l baturiciu de xente escanciando sidra malo na puerta del "Galiana" y l'hotel "Asturias", moviendo calcaos cadriles con esi acamar de picardiosa por cubrir. La carne ye la carne y el deséu, llibre. La danza ente dos nun ye otra cosa qu'antoxana amatorio, escitación d'enerxía terrenal y vibración vital. Los pocos que se cuidaben de l'actuación movíense navegando una mar esteno, una mar bella que camudaba en barallos cuando les pareyes xuntaben nuna carne. Guapo, sí.

Los cazurros de Valladolid, los "Celtas Cortos" canciaben otra historia. Frente a los añosos cubanos ellos, más mozos, diben de fola escontra cantil. Énte el son suave y la cumbia o el montunu de los saudosos cubanos, los cazurros llevantaron la berría. Muncho ellectrónico, muncho volume de ruíu y glayíu. Muncho prescindible.

L'antoxana del saludu, con un "salú y anarquía" diz abondo de quien vivi, xusto, de la esistencia de lo que se combate. Los mozos repitieron cancios que yá sonaben a vieyo cuando los estrenaron cuantayá, de la que, más mozos, enxertaben no que se llamó "música celta". Fartucaron de falar de les barricaes, de facistas escorriendo a emigrantes, de lo de llevantase del sillón pa camudar un mundu malu, mui malu pero, ¡coses de la vida! non tan malu como pa nun mantelenelos na fola consumista que-yos paga les factures. Preguntes retóriques invocando a los santos de la progresía, esos que nun tiene ilesia material porque cada "progre" llévalos nesi ara perpétuu que ye'l póster del Che y la estrella de cinco puntes. ¿Qué diría el Che, y Sandino, y qué Allende, énte lo malo malísimo d'esos imperialistes que xinten nenos, primero nel Vietnam, darréu n'Irak y agora... ? Ambute demagoxa, en paxu y goxa.

Pa min ta claro que la involución ye otra forma d'evolución y estos Cortos (de vista llargo pues saben cómo vender emocionalidá pa llegar a fin de mes) involucionen hacia l'ovocitu primordial de la sopa d'Oparín. Sicasí, la gaita ellectrónico-yos suena bien y dalgún canciu de la primer época ye prestoso.

En fin, un fin de fiesta amañoso dando pilancos y pagando el "mojito" a 5 euros (más d'800 pesetes), bocata tortiella a 3 euros y, los más intelixentes, fabricando muncho botellón gracies al Carreful.

Hai qu'esclariar qu'a los Celtas Cortos metiéronlos pa la playa de Poniente, a tocar na antoxana de la zona caro y residencial. Pensando mal ¿qué otra cosa podría esperase d'un gobiernu municipal supuestamente socialista? Pues eso, meter caña a los capitalistes de primera llínia de playa. Faltaría más.

Prestosu martes d'agostu inciertu, n'añu 9 del dos mil.

L'ESPECTÁCULU SIGUI...

Parte de la esperiencia d'anguaño, ente seres simplayos que nun saben que lo son (pues son durmientes) ya la incapacidá personal d'enfrentar aquéllo que, emocionalmente, nun saben (o nun quieren, siquier dende la incosciencia) remanar. Siendo durmientes ye normal actuar asina. Esto, pa min evidente, trai una infantilización social mui comeniente a los poderes fácticos.

1.- LA MUERTE D'UN FUMBOLISTA.

Oyo pola radio qu'un fumbolista muerre mientres l'equipu, faciendo caxa (ello ye, ufriendo espectáculu p'alforxar cuartos por esa actuación) viaxa pel estranxeru. Darréu esa muerte l'equipu suspende la xira, cola pa casa y los estamentos oficiales d'esi deporte, y los parásitos-políticos d'esa estaya alministrativo, declaren llutu oficial y folixa vario. "Sniffff", faltaría acutar.

Podría camentase, de mano, que l'actitú de suspender l'actividá económico-llaboral tien un aquello de sentimientu profundu, de comprensión énte lo inevitable y lo pasaxero de la esistencia. Pensaríase n'homes fechos y derechos compunxíos, (por supuesto, bien pagos) galdíos pol dolor de la perspeutiva d'una ausencia perpetuo. Podría ser, pero non. En realidá ye una amuesa más de la infantilización social.

Notros tiempos, notres profesiones más dignes, o, cenciellamente, ente xente adulto como l'actor que perdi a un ser queríu, el payasu que perdi un amor pa siempres na fría ausencia o l'anónimu ciudadanu que tien de siguir camín solu, la vida sigui y sabe que l'espectáculu tien de continuar. El meyor homenaxe que se fai al ausente ye la normalidá, la llucha cotidiano y el respetu espeyao na continuidá de la esperiencia. Por embargu los nenos, los infantiles, los emocionales irracionales usen el mesmu sucesu pa desconeutar de la realidá, cuando non pa aprovechase d'ella faciendo duviellos mentales.

Ún espera que l'adultéz sía el resultáu natural del camín de maduración, ello ye, d'entendimientu de lo que, bramente, ye la esistencia humano. Quiciabes ye muncho esperar cuando la sociedá humano, gracies a factores ideolóxicos dominantes y a la so debilidá mental, cultivao arrementes por dirixentes sociales, nun ye otra cosa qu'una gran guardería de nenos de tolos tamaños.

Ún de los grandes paradigmes remanaores ye la (cuasi forzosa y subliminar) infantilización del individuu que, espolletando n'edá biolóxico, permanez infante (y, poro, dependiente, a lo menos, emocional) tola vida. Eso desplica la falta de responsabilidá qu'amuesa la mayor parte de la xente cola que topamos dayuri. Ye sintomático que naide nun sía responsable, o que se refugue el pagu de consecuencies resultáu de los actos que se fain. Tratau como nenu, l'adultu infantilizáu fuxe d'una mayoría d'edá y s'abelluga na corripia materna del estáu, del sistema, que lu protexe a cambéu del tienru y freñetible sometimientu infantil acríticu.

2.- XINTAR RICO RICO

La fala ye potente preséu de configuración mental. Yes munches coses pero nun va ser la menos importante la de cómo fales, la de lo que dicis; la de lo que óis y repites. L'animal humano, como especie gregario, necesita formar (o, polo menos, sentise) parte d'una brañada. El pertenecer a una reciella o a una manada ye estratexa evolutivo que da grandes beneficios na sobrevivencia de la especie y nel home ello parez vinir d'un pasáu de presa más que de predador. En cualisqueir casu, con independencia de la xustificación etolóxico del comportamientu brañeril, la permanencia na corripia social depende de la mimetización conductual del individuu pa col restu d'animales. Poro, la repetición de comportamientos y, ente ellos, el de la fala o la forma de la fala. Y la fala, como productu inteleutual, nun solo espeya la fonte de la que vien sinón que, por rellación biunívoco, tamién la configura.

Ferramienta d'infantilización social ye l'usu n'abusu de los diminutivos. Y ye mui evidente na fala del fogón. Nos programes de radio y televisión ye alloriante contemplar a xente arrecho y correcho falar como neninos cuando dicin de cantidaes, de cuánto echar o non echar, de lo que cuidase y, a mayores, del nome de lo que s'emplega nel llar. Estos animales, bípedos e implumes, dicinlo too en diminutivu infantil como si falasen pa retrasaos mentales o pa xente cuidoso, fácil d'axorizar, d'enllerciar. La cocina de los "mass-media" ye un universu de desinencies que pretenden familiariedá pero qu'amuesen, ñidiamente, una infantilización social alloriante. Personalmente fartuco oyendo nomes y alxetivos terminaos n'inos, n'itos, n'icos. Ye como si, repito, los doctos espertos, falando pa subnormales o incapaces, quinxeren facilitar la llabor pescanciaora del discente tratándolu como menor d'edá. El resume, la comprendoria, ye'l siguiente: tratándote como minusválidu, eso ye lo que te fain.

Toa programación entama pol llinguax. Una ciencia, o una de les sos especialidaes, nun ye otra cosa qu'una modalidá llingüístico funcional que describe procesos y procedimientos y ye evidente que lo que describe'l mundu te costrui'l mundu. El retu d'un "cegaratu" visual nun ye'l nun tener güeyos funcionales (que tamién lo ye) sinón el de que la pallabra describa fielmente'l mundu que tien de criar nel maxín.

La infantilización social ye, como diximos, una ferramienta controlaora más al serviciu de los malos. Porque, hai que lo dicir, vivimos ente xente mui malo (poca, pero mui importante nel sen de poderoso) que necesita de la muncha bona xente. Y la necesita en términos que se pescanciaríen mui bien emplegando conceutos de la termodinámica. Pero esi ye un tema pa otra xornada.