Entradas
Los grandes homes nun mos dexen. Bramente, somos nós los que, escaeciendo, sapozámoslos nel tenebríu de Kronos. Y, d'aende, nun los sacará naide que nun sía otros homes más cuidosos de l'alcordanza d'aquéllos que, d'aquella grandes, col tiempu espurren n'imensos.
Mas, mentantu aporta esi intre venturosu del redescubrimientu de la obra fecho, lo cierto ye que la memoria del ausente nun dexa d'amenorgar baxo lluvia de povisa y indiferencia insensible. Porque, a la llarga, ye la insensibilidá, cristalizao en normalidá, lo que "te" muerre y lo que "te" mata.
En llucha pola sobrevivencia de lo que foi tan los resclavos d'una vida material que yá nun lo ye. Esos ñicios de quien coló pa otros espacios, quiciabes más xenerosos pero, dafechu, diferentes. Falo de la caxa marrono de la brúxula ausente. De la broca esfelpeyada n'espera d'un afuracaor tan ausente como les ganes d'usalu. D'esos zapatos del cuarenta y ún que naide nun va volver poner. Eses madreñes. Esa ferramienta. Esi rotulaor gastao qu'ensuchó nel tiempu d'ausencia y rindió baxo'l firme pulsu del costructor, del chapista, del vendedor de seguros...
Falo d'esos papeles yá mariellos, cola so lletra, que recuerden datos y feches y encargos y encamiento. Lletra que fala d'un caráuter, d'un corazón arrechu, d'un enfotu. Y surde la entruga que trai salmoria a los güeyos del qu'escribe y mares a los de quienes lu trataron. ¿Ú andes, amiguín?
Lo malo ye que nun solo coló l'anima del ausente. Coló tamién la so enerxía espeyada na gracia de la vida que lu arrodiaba. Les coses que lu acoyeron tamién noten l'ausencia y paecen allampiar pola presencia de quien les ponía en vida, en trabayu, en puxu. En cuentes d'ello hai silenciu. Silenciu y rampiña. Falten coses, amiguín, falten coses que, en xunto, nun valen lo que valía la to presencia. Falta esi valtu de capitán, de gallu de la quintana, de xefe en comandita. Esta visita a la to obra, barrunto que la mio cabera, amósame más tristura que davezu. Too esbarrumba. Too apigaza.
Espero que cuando la otra rueda del carru venza, la carga d'aquéllo que fuisti nun venza, tamién, lo bono de lo que dexasti.
Esti "martini" añosu nun m'afuega la pena.
Costante
