Entradas
Causalidá, causalidá. Tienes el nome crudo del préstamu llatino. Acútesmos de contino, per dayuri, enantes, agora y, de xuro, mañana. Los inorantes camúdente'l nome. Los matemáticos imaxinen elegantes comprendories que t'igualen n'ecuaciones de muncha enxundia. Muncho y bono fais. Muncho amueses y pocos te pescancien. Naide nun atalante esa filera de socesos que desafueguen nel fechu que marca, dirixe, decide... Naide t'espera mas tu a toos alguardes.
Un exemplu de lo máxico.
Una persona cesa n'altu cargu. El subordináu inmediatu propón una comida y un regalu de dispidía. El regalu ye a escote, d'igualitariu repartu oneroso pero ello nun me parez xusto: nun gana lo mesmo l'aprendiz que'l xestor de riesgos. Siempre me pareció inxusto eso de repartise a iguales partes les cargues financieres pa regalos, fartures y otres cosadielles de raigañu social pues, si perres son razones nun toos tienen les mesmes a la hora de cotizar en sociedá.
Fecha la propuesta, y metíu nesi intre tontu que toos podemos tener d'avezu, digo que sí, que cunten comigo pa eso del regalu pero que de la comida de dispidida, ren de ren, que nun toi pa dixerir hipocresía. Y en casa siéntome mal por descubrime tan faltu d'autonomía pues, ¿daveres querría compartir la carga d'un regalu a un perfeuto desconocío que triplica'l sueldu de la mayor parte de los subordinaos? ¿Acasu, como políticu, nun va yá bien pago destinao notru puestu perfeutamente prescindible y a costa del contribuyente? Decido falar col inmediatu subordináu del cesáu pa dicir que non, que nun pongo un céntimu, que nin lu conocí nin lu traté y que l'amor ye cosa del roce y a esi puntu nin lu rocé nin lu golí.... más o menos. Asina qu'empobino pa "la ñocla" -l'alcuñu del puestu de trabayu del cesáu- y, ¡oh sorpresa! ¿A quién m'atopo a soles nel ascensor camín del llugar del trabayu?
Sí, asina foi: al mesmísimu cesáu. Intercambéu pallabres educaes y formales y lu dexo saludando a los antiguos subalternos. Yo voi pal despachu del subordináu inmediatu y, primero de falar con él, suena un teléfonu y oyo cómo fala con otru diciendo que'l regalu, una placa de despidida, va salir por unos .2 euros a escote pericote. Y reflexono: ¿paga la pena quedar como la gocha antona por dos euros?
La causalidá quinxo poneme nel camín que me permite quedar como un dios menor, guardame d'enemistaes y cumplir, como una oveya más, nesti suqueru que facemos de la vida. Nun tuvi d'abrir la boca pa dicir al encargau de la folixa "aende te dexo los dos euros".
Puedes, pero nun debes, dir escontra lo causal. Si lo fais, hai que pagar un preciu. Tu elixes.
Costante Álvares
