Xente qu'anda perequí :-)

martes, mayo 06, 2008

¿Quien saca porgüeyu?

Mui cómodu nesti requexu de la nada, gloriando les ventaxes d'una sociedá apellidada democrático, bien alimentáu, meyor istruíu. Privilexáu de dones y daos, amores y arumes, saberes y dicires. Enfarxopetáu de sobeya disculpable, (aquélla que t'acute no irracional de la comparanza y el xuiciu), miro la pantalla d'un llonxanu televisor catódicu. Que me trai semexes d'inxusticia. De fame gollono. Incómodes entrugues, inda por facese o encarnar n'aliendu dormiyoso.

Ye velea inarreblagable aquello que t'amuesen los otros. Los otros falaxes que dicin de lo inxusto. Los otros quexumes, que xuxurien rocea. Esta empresa, que llamo humanidá, paga pocos dividendos en felicidá. Poco, y malo, si ye que cuadra pagalos.

Y, por embargo, l'aciar collecha del dolor, la muerte y el desenfrenu espuxiga y espuxiga, xorrez perdayuri, apina los copinos d'interesosos mercaderes. ¿Quién, o qué, garra provecho d'ello? ¿Qué prestosu o infame fín sigui esta inatalantable traxicomedia de lo humano?

Sí. Persé que la llépara del poder enancha la malura de la que vivin éstos y aquéllos. Sí. Persé que'l miéu nun dexa d'espurrir nes mentes del home asustáu por otros de la so castra. Pero sabelo ¿tendría de dame sosiega? ¿Mios nueches o díes tendríen de ser más llevaderos? Pueque la depresión estético xuegue bien, y sía comeniente, na casa de románticos tardíos, humanistes remolíos pola natura primixenio del zoo-politikón o vividores de lo fondamente prescindible. Hai munchos "pueques", munchos "alomeyores", munchos "quiciabis". Tantes rempuestes como boques que les pronuncien. Tanta enerxía negro como pozos nos que sapozar o furacos nos que se meter pa fuxir d'esta feúra y balduernu.

Tien d'haber una razón pa que un chinu, por exemplu, sufra cárcele en casa propia por atrevese a pensar xebrao d'una dictadura socializante y humanista, pague la bala que lu asesina o cuche la erma tierra tibetano. Dalguna razón va a caltener la muerte n'españíu de fuegu, metralla y bofu. Tendrá d'habela nel nalar inerme del calabre entullíu de negru ablancuxáu pola sal y pol sol d'un mar d'insufrible fríu azul. Que desplique les fondes engurries de piel ensucho y sable en sangre d'abandonaos en desiertos y sableres. Mientres l'atopo, esa razón digo, sigo plasmando.

Al final, si ye que'l celebru furrula normal, yes tu frente al mundiu. Solu. Espíu. Ceo t'abelluguen del fríu y la fame. Te formen. Te firmen. T'etiqueten. El cuñu del esclavu na frente. Yes cosa, propiedá, inversión, delda. Y se cuiden de llamate llibre. D'emponderate, si sigues la sienda de los pocos sabientes que nel mundu fueren. Al final, d'orixinal, pases a fotocopia.

Como compensación, unos cuantos s'encarguen de solmenar a eso que dellos nomen "Sistema". D'encarar molinos quixoteños con poco más que carne de cañón. De glayar cualos glayos a ramplíu. Rinchen concencies. Semen cementerios.

¿Por qué hai tanta xente que quier facer llibre a los otros? ¿Por qué hai tantos criadores de cielos ena Tierra? ¿Por qué hai tanta ilusión en facer mundos meyores estermiando el meyor mundu que ye esti? El únicu que tenemos.

Barrunto que tien de ser francamente insoportable, invivible, un mundu presuntamente inperfeutu si formes parte d'una élite con poder fáctico que sabe, por revelación divino o racionalismu humano, lo que ye comeniente pa tolos otros. Si tienes esi poder, solu o en comandita, tien de ser irresistible el metese a criar un orde social, una relixón, una psicosis, una revelación, una tribu, una nación... Nesos términos, solo se pué facer bien diciendo y forzando el caminar de los otros pa contra esa comeniencia lliberaora, esi enfotu paradigmáticu de xusticia, d'axiomáticu igualitarismu, de tienra fraternidá, d'uniforme socialismu, de xenético humanismu, de reveláu islamismu de pueblu elexíu...

Mas, por embargu, perdayuri oyo murniu quexume, españíos metálicos, llamentos aforfugaos y, tamién, l'atavientar de calabres apodrentando na homedanza de la viesca, o ensuchando baxo' l sol de la sablera. Homes, dondos, vistíos de victimarios, (pue que con gorreta, galones y arma d'estampación mediantes) matando a otros homes, tamién dondos, que parecen nun querer vivir esi enfotu paradigmáticu de xusticia, d'axiomáticu igualitarismu, de tienra fraternidá, d'uniforme socialismu, de xenético humanismu de reveláu islamismu, de pueblu elexíu...

Tantu dolor ¿a quién (o qué), alimenta?

Costante Alvarez