Xente qu'anda perequí :-)

lunes, diciembre 17, 2007

AMISTÁ

Depués d’años d’años ocurrióseme saludar a un collaciu apurriendo-y un mensaxe a una direición que nun sabía si inda taba correuto o operativo. Los años train munches coses, ente elles, l’esbarrumbe d’axendes y tópicos. Pa mio sorpresa recibí contestación y datos. Datos doliosos de carnes en igua y güesos francíos por inxeniu mecánicu. El mensax trescalaba un ciertu aire de muerte incompleto cabo la gayola del re-atopu virtual. Forzoso esclariar que nun conozo personalmente a esti collaciu y, por embargu, como talu lu tengo. Son les coses de la rede.

Nun tiempu qu’agora parez llonxanu, n’Astur-List y en soc.culture.asturies, un mozu (pa min tola xente ye mozo) quinxo siguimi na aventura de desndolcar la mio primer novela y, amás, creo que tamién la primer cibernovela n’asturiano. Solo supi d’élli por correos ellectrónicos y contestaciones nos filos que s’entamaben darréu tener mangao el capítulu correspodiente de la espurría historia d’una Asturies máxica, esperable y daqué espantible. Y un bon día, coses del enfotu, sorprendiome esti amigu con un sitiu internéticu ú aviare aquella novela que diba faciendo por entregues y ensin decatame d’ello, pasín ente pasu, porque l’enfotu primero d’aquella llabor nun yera la criación lliterario, senso strictu, (eso ye evidente en cuanto se lleen los primeros capítulos) sinón l’esconxurar un degorriu personal que me furaba les coraes por nun ser cuidosu y nun tener bien medio l’enemigu qu’encarare en foru. D’aquella velea, ciertamente, surdieron los personaxes pero tamién gracies a la ispiración qu’afayé na novela “Los xintaores de calabres” de Michael Crichton. Y güei, aquél desconocíu collaciu que tanto esmoleció poles “Lliendes de l’Asturies Primera” vienme a cuntar lo bono d’atopame y lo malo d’una caida de moto, tando nun xuasús de palmala pola mor d’ello.

Separtándome migayín d’esto vo facer una reflexión. Cuando se conocen les razones de la esistencia (pue sonar pelín presuntuoso) queda poco pa la sorpresa. Conocer les llendes de la vida, les razones d’embullos, dolores, penes y gayoles… lo relativo de lo absoluto y lo importante de lo inatalantable… en resume, el sabelo (cabruño nello) date una perspeutiva bárbaro y una sosiega d’alma que nun conoz otra igual permítiéndote relativizar tiempu y espacios. Como dixo ésti collaciu hai años, “vaca más gorda nun entra en práu” y ello ye mui cierto nesti contestu. Agora que pueo mirar el pasáu con güeyos de futuru xulgo indulxentemente el camín caleyao. Pero solo xulgo de papu sanu. Yo, como toos, como Aedrics, Wanics, Vulina, Sairina y tolos otros personaxes de l’aventura imposible, tamién tengo guíes, mayestros pero, sobremanera, servidumes. Como ellos, encarnaos o non, sufro ‘l destierru de tar na Tierra, l’afoguín de respirar aires viciaos, la esmolición de tratar besties d’humana apariencia, la cansera de repetir la mesma escena, una y otra vuelta, ensin esperar siquier el curtiu aplausu d’un públicu abducíu y dormiyosu. Y como ellos, doi les gracies por esistir equí y agora, por exercer la oportunidá del autodermin personal, en resume, por vivir en llibertá la esclavitú elexío. Doi les gracies a quienes m’ayodaron, a los que lo fixeron con tenrura y muncho más a quienes usaron de la violencia pues muncho de lo enlleno namai s’aprecia dende lo valero. Y apurriendo gracies y más gracies aporto a esti collaciu ensin rostru.

Espero atopalu dalguna vegada. Y que, tamién, atope ‘l sentíu de la vida. Aquella película de los Monty Python ye mui prestoso.