Caravana

Non lu conocía más allá de lo evidente: vivía nun remolque piquiñín. Una d’eses casines con ruedes al estilu de los años 70s.

Non lu conocía personalmente porque nunca nun se me pasare pola cabeza entrugá-y daqué pues nun tuvi nin tiempu nin ocasión pa ello. Pero pa conocelu yá taba mio muyer que, con esi almirable aire de Taresa de Calcuta, reparó nél y un día interesose del porqué de vivir naquel barcu enroncháu nel corneyal d’una antoxana de barucu de carretera. Supongo que baxo preciu y pagu de servicios nel bar, a unos ocho kilómetros de Xixón y, paradoxes del tiempu y l’espaciu, a menos de cien metros d’una residencia pa vieyos escaecíos por familia y muerte, aquel home mayorín traxinaba la so vida al mou de xudíu errante o xitanu caleyeru. Xubía y baxaba pa Xixón cuando se-y antoxaba por aciu la llínia autobues de La Pedrera y, pa cuando morría la tardiquina y xubíemos en coche pa recoyemos nel práu, solíemos acolumbralu metanes la solombra que yá adueñaba del interior del remolque, sentáu y caciplando. Nun me paicía mala vida.

El día de la selmana que descansaba ‘l bar yera mui evidente la so presencia pues na antoxana, ausente d’automóviles de clientes, solo se vía aquella caravana repintada de blanco y techu d’arcada románico. Caravana que, misteriosamente y col pasu del tiempu, foi diendo, pasiquín ente pasiquín, al disimulu, dexando l’asfaltu de l’antoxana pa internase nun cachín de yerba qu’atiestaba col práu vecín y que taba desfilao por matos xorrecíos. De xuro que los propietarios de bar encamentáron-y dexar l’asfaltu pa otros clientes.

La cosa ye que supi d’él lo que me cuntó mio muyer: que taba solu, ensin familia y que nun-y gustaba tar nuna residencia. Que-y prestaben muncho les muyeres y que por culpa d’elles (eso supímoslo dempués) arruinó.

Un día, al enfilar la recta de la carretera, decateme de que nun taba la caravana nel sitiu esperáu. Como yá formaba parte del paisaxe del asfaltu de la carbonera solo fo noticia pa min l’ausencia. Y nun sé si fo por eses feches tamién que, como davezu, regresando d’Uvíeu pa Xixón nel tren de cercaníes de les tres de la tardi reparé nuna caravana mui parecía a la del paisanín. Caravana que daquién toviere mangao nun práu de Serín qu’atestaba cola vía del trén y que, hasta entóncenes, solo viere acompangao d’una caseta de chapa ferruñento. Cuando comentelo con muyer esclariome que’l paisanu morriere. En fin, coses de la vida.

Nun pasó muncho pa ver, xusto nel sitiu en que taba la caravana, un pequeñu trabayu de xardinería que mangare tres plantones d’arbol por definir. Supongo que los propietarios del bar decidiéronse a adecentar el sitiu pa evitar tentaciones d’otru okupa consentíu. Y esti diba ser el fin de la historia sinón fuere porque una visita a una amiga de mio muyer, agraciada col dáu de los doctoraos en CEMeDe (comunicación pa ente mundos dixebraos, raza humano pa dar de comer aparte del restu los mortales) alvirtióme de que teníemos un okupa en casa. Sí, esi mesmu: el paisanu de la caravana. Bono, bramente, el so espíritu.

“¡La puta que lu parió!” dixi nel intre que lo supi. Nun vo negar qu’espelurcié al entrar en casa. Tampoco negaré que sentome mui mal eso de que daquién se metiera na mio vida ensin invitación. Nel “mio” espaciu. Lo curioso yera que, sigun la CEMeDe, namai siguía a mio muyer y solo deambulaba pol cuartu d’estar y la cocina, respetando dormitorios y bañu. Mui educáu pola so parte. La CEMeDe confirmome que l’estáu d’amenorgamientu enerxéticu qu’había unes poques feches sufría mio muyer desplicábase pola presencia d’esti ser dignu d’un programa d’Iker Jiménez o de los finaos profesor Germán d’Argumosa y Dr. Giménez Del Oso. La solución pa echalu foi oración, veles pa empobinalu a la lluz y la quema d’inciensu (daqué que parez que tarrecen los espíritus acosaores, xunto col fedor a amoníaco). Alcuérdome que lo menos malo que-y dixe fo de cabrón p’arriba. Noxáu taba.

Mas mio muyer nun-y dió muncha importancia. Cierto que al sabelo protexose frente al espíritu (hai técniques mui afayaíces pa ello, ente elles, la cruz cabalistica) pero como bona y sensible sabeora del mundu de les enerxíes quinxo conocer más del porqué d’aquella visita inesperao. Foi pa cola amiga y enterose. L’espíritu de la caravana nun viniere a casa a acosar, como nes películes d’espelurciu que tanto presten a los mozos aberrantes, sinón p’agradecer. Cuando morrió, sabiéndose muertu, nun quinxo marchar sin dar primero les gracies a mio muyer. Lo que interpretamos como un acosu nun fo otra cosa que la meyor manera que vió l’espíritu del paisanín p’agradecer que mio muyer fuera la única alma que-y rezare. La única qu’esmoleció pola so partía al morrer solu y n’aparente desamparu. En realidá nun se debe minusvalorar el puxu de la oración.

Dende llueu qu’el disturbiu enerxético provocao pol espíritu nun fo fecho arrementes pues él nun sabía que taba zucando enerxía de mio muyer. Y, por supuesto, yo fui mui babayu al xulgar apriorísticamente una situación de la que desconocía tolos datos. Cierto que son coses de la vida el xulgar mal a los otros y el poder facer dañu ensin querelo, pero más verdá ye ‘l que solo fallando perfecionámonos na dura y espurría costana de la vida.

Poques coses de la vida son importantes dafechu. Y d’eses poques, la mayoría son negociables.

Ambientes d'Espuxigue

Cuando necesitamos espresamos tenemos pa escoyer munchos escenarios. Si s’acota la esperiencia a una realidá material van ser forzosamente materiales y diversos. Neto que nuna plaza d’abastos vamos atopar muncho tipu d’alimento ello ye, munches esperiencies pal alma. Esperiencies que son cuidadosamente escoyíes por nós, col gabitu de conseyeros, p’adeprender aquéllo necesario al espuxigue del alma.

Escoyer un determináu mundu, sistema de realidá, planeta o planetoide depende grandemente de les carauterístiques nates de nós. Les dixebraes configurances de la enerxía que caltenemos dende la nacencia permiten solo xugar en ciertos escenarios, en determinaos partíos y puestos de xuéu. Mas, lo interesante nesti puntu, ye saber en qué estadiu de xuéu podemos xugar y con cualos collacios. Sabemos, polo visto, que vamos interactuar coles almes primaries del nuesu grupu y, ocasionalmente, con aquélles otres que conocemos gracies a los periodos de socialización estraacadémico. Col repartu d’actores yá elexío quedaría namai que fixar el marcu ambiental en que desendolcar los papeles de la obra de la vida.

Pa pescanciar esto tenemos d’escoyer un puntu de vista ampliu, enanchar les entendederes y relativizar la tópica étnico y xeográfico. Les almes necesiten adeprender cola esperiencia y ésta reside nes relaciones humanes, na socialización, nel contauto interpersonal. Poro, daveres va a ser irrelevante el sitiu, el llugar, tiempu, raza, o paisaxe escoyío pa realizar la esperiencia. La importancia d’éstos factores étnicos o xeográficos ye relativo a non ser qu’enzarren un componente esperiencial específicu y/o esclusivu. L’amistá, l’amor, l’odiu, en xeneral la vivencia d’emociones y sentimientos humanos, solo depende de la psicoloxía del individuu de la especie. El mediu en que desendolquen ye solo un escenariu más de los munchos posibles y da sabor al platu esperiencial, pero más nada.

Pensemos na necesidá de trabayar nun sentimientu determináu. Pué ser d’abandonu, de solitú o perda. Escoyamos ún cualuquier. Seyendo universal, ello ye, padremuño de la especie humano, ye irrelevante el llugar de la esperiencia. El resultáu va a ser el mesmu esperimentándolu metanes una tribu africana, asiática, amerindia o europea y, poro, ye irrelevante que la comedia o la traxedia desendolque metanes una ciodá del llamáu primer mundu, una aldega del áfrica fondero o una indeterminada corripia d’amiseriaos por tar oriellaos de la corriente consumista. En tou casu, el mordigañu de la solitú, el desesperu del abandonu o la perda del ser queríu son esperiencies psicolóxiques del home, lleciones qu’adeprender pal alma, situaciones fáctiques ciertamente inxertaes nun determináu paisaxe que, dafechamente, pué facer más o menos rescamplante l’actuación del actor, pué criar ambiente, pero non amesta un res a la emoción o al sentimientu qu’espeya la situación emocional o sentimental que s’estudia, ye dicir, s’esperimenta.

Los fenotipos sociales, la condición económica o xeográfica d’un grupu humano, la pertenencia a clases sociales determinaes, too aquéllo considerable como esóxeno, esterior a la persona conceutalizao na so radical unicidá, amplíen los matices, el croma si se quier, de la esperiencia pero non costitui razón suficiente o necesario d’aquélla..

Cuando se busquen escenarios esperienciales lo importante ye aquéllo que ye necesario adeprender. ¿Trátase de la tolerancia? ¿De superar l’arguyu? ¿D’arreblagar perriba ‘l sexismu, el racismu o claismu social? ¿Trátase de superar la envidia, la rensía, el noxu, l’atuñamientu? Sabiendo esto escoyeráse un ambiente afayaízu por cuenta les preferencies personales en cuanto a nuevos paisaxes, tipos d’estructura familiar, necesidaes económiques que solventar, dificultáes de la vida elexío...etc. Exemplos hai munchos. Citaré unos cuantos notru llugar

P'acabu, sopelexar que, ciertamente, lo que mos fai humanos son les bondaes y faltosidaes qu’habiten el cuerpu del antropoide que somos mas nun lo ye menos el que pa’l alma nada significaríen eses coses ensin el sustratu esperiencial que les caltién. Negru, ricu, probe, blancu... Lo de menos ye la etiqueta, la funda cola que vistise, el paisaxe en que vivir traxedia o comedia. Como almes, espuxigar supón vencer les prebes que voluntariamente aceptamos y nesi movimientu de superación tenemos permisu pa elexir el decoráu que más preste, el que meyor s’afaye al nerviu de l’acción o, cenciellamente, aceptar o refugar el disponible pa lo que queramos trabayar.

Drosophiles

Drosophiles anuncien la seronda (primeres invitáes de la mayada), ------------------------------------------------------------- Sé que la seronda yá ta equí dende que l’arume de sidra del duernu perfuma mio casa. Trainla en botelles de plástico, de formes diverses y xebraes marques, cases, etiquetes, volúmenes y colores. Con o sin espluma, burbuxa o tapón. Y en viéndola sé que cumpliose un círculu espacial y especial: un añu, de fecha a fecha y un fechu, de vida a vida. Escuso el fecho y glorio de la fecha, paradigma d’acabación y collecha, de vuelta a nueches espurríes y sol en retirada. Pa dellos ye penible pasu de depresión psicolóxico, contestación a demanda de divorciu o anunciu de males de rema. Ye comeniente al home dixebrar la vida en fases, cachos de tiempu discreto, finxos y paseres. Éstes pa xubir la costaña de los años; aquéllos, pa mozquiar les estaciones de la vida, y, aquélles otres, pa disculpar perdes sentíes como avergoñantes. Como estratexa de sobrevivencia nun ta mal pero diz poco de lo muncho que pue traer una cabal comprensión d’esta estación añal solo padremuñu de ciertes rexones del planeta. Bríndamos la xeografía de la tierra del felechu cuatro ocasiones de sentir ferver el sangre de la vida. Cuatro que, bramente, nun lo son pues, ye valero dicilo, la vida nun s’escuende en cachos o faces sinon qu’espurre n’interminable continuum d’intres, numberables con procuru, cuando son doliosos o llaceriantes a alma, pero de fácil olvidu na gayola. Intres infinitos, cierto, pero con claro entamu nel amor de los pás que xuntaron carne y deséu pa encarnamos. Y asina, d’esta miente, espurriremos el tiempu personal como ‘l conxuntu de númberos naturales: con un entamu ciertu y un final, tamién ciertu pero infinitu na so infinita división d’intres bonos, regulares o malos. P’acabu, atopémonos cola matemática que, daveres, nun ye otra cosa qu’una clas de ruiu, una vibración, un orde que reflexa otru más poderosu y omnipresente, totipotente y lliberaor. Sirva esta reflesión sobre la seronda de curtiu cantu al incesante camudamientu, a la imparable rueda de la vida que mos trai les esperiencies necesaries pa xorrecer como lo que somos. Que caún-y mangue a esi “somos” el nome y/o axetivu que-y cuadre, pruya o mereza.

Gobiernu de les Emociones

Puntos de Vista ----------------------------------------------------

Muncho del fracasu de les relaciones humanes sofítase na incompetencia personal na identificación y valoración de la intención del otru lo cualo, forzoso dicilo, nun ye tan estraño sufrilo y entendelo. La intención ye “in”–terna, ello ye, interior y, poro, desconocía a priori, especialmente pa quien va a recibila. Arreblagando la consideranza de que si s’investigare la intención fondamente tamién va a ser, davezu, desconocía pa quien la tien o produz, lo cierto ye que diferendos, ofenses y engarradielles entamen por una falta de perspeutiva emocional sobre l’otru. El casu típicu ye’l de la persona que llevanta de la cama contenta, atopa a otra y fai un comentariu xulgáu “normal” pa la situación del intre. Darréu, la otra persona enfocica con deseperu del recién llegáu que nun sabe qué callu pisó. Nesta situación demencial ¿quién tien el poder? Porque, nun s’engañar, en toa relación humana ye eso lo que se xuega: poder, sensu latum.

Llaceriosamente nun esiste un pulsaor máxico que calcar pa, sinón gobernar polo menos parar, el tarbulín emocional de reproches qu’empobinará la relación a una espiral destructivo. Pero hai que caltener en mente que ráramente va ser una sola pallabra o actitú la responsable de la tormenta. Como muncho, va ser la gota qu’acorrompine un vasu enllenu d’aciares frutos.

Mas, sicasí, ñegar la esistencia d’esi máxicu botón nun mos releva de la responsabilidá de la situación creao o sufrío. Como munches coses de la vida, solo hai un control a posteriori y ye inútil razonar en situaciones d’emocionalidáes confrontaes. Nesti puntu ye ú la intelixencia, el bon xacíu, la manu isquierda o esi famosu sestu sentíu algamen el so cabal valor. Aquél que tenga meyor trabayao la intelixencia llamao “emocional” podrá ser l’aniciu de la reconducción de la situación pa hacia una tópica amañoso que desdramatice ‘l sainete, la obra de teatru que ye la vida.

Lo normal ye plantear estes (y otres munches) situaciones en términos dicotómicos lo cualo trai grandes perxuicios y pesares. Lo comeniente ye pescancialo primero de buscar esa situación dicotómica. Falo de non afitar, de mano, quién ye l’ofensor y quién l’ofendíu, quién víctima y quién victimariu, quién bonu o malu, inocente o culpable, bobu o más bobu pues, en toes les situaciones de la vida, los papeles de la obra de teatru que desendolcamos emocionalmente son bien “intercamudables”.

Pisar, y ser pisáu, ye parte de la esperiencia. Adeprendamos